في مرّه جيت سايق خطّاي ،،
حالف يمين أهديك ريد ،،
لا شفتّي زيّو في دنيتك ،،
لا جاك زائر من بعيد ،،
أصلوا الغرام الشّايلو ليك ،،
يادوب بيرضع في الوريد ،،
وباكر بيكون شايفاو عيون ،،
والدنيا تصبح لينا عيد ،،
وتشوفي زول خاتّيك وين ،،
في قليبو جوّه عُمر مديد ،،
راجي القمر ينزل يقول ،،
هجّر المدار لي زول جديد ،،
والحب وصال يجمع قلوب ،،
يحكّي الجمال كلّو ويعيد ،،
ويبقي المُحّال سهل المنال ،،
جمًع قلوب وفي الريد بزيد ،،
أحلف وأقول ياكي العزول ،،
ويبقي القليب في هواك شهيد ،،
رغم الظروف أنظم حروف ،،
وأنضُم درر لأحلي جِيد ،،
أبوظبي - 07 / 02 /2009م
ليست هناك تعليقات:
إرسال تعليق