المشاعـر الكامنة في ّ..
دايرة تخـرج للحقيقة ..
والفؤاد الصاينـو ريدك ..
كيف نيران الشوق يطيقا ..
والبـريق الفي عيونك ..
يضوي لي عيني طـريقا ..
والدرر خلـف إبتسامتك ..
لألئ تبهـر بي بريقا ..
والعيـون جافت مناما ..
والحناجـر جفّا ريقا ..
إنتي لي ذاتي المعاني ..
إنتي لي قلبي العشيقة ..
إنتي طيفـك لما جاني ..
كنت دايروا يكـون حقيقة ..
والشمس في سماي غابت ..
لمّا شمسك حـان شُروقا ..
لو في يوم حاولت وصفك ،،
وقلت منو الناس تعـــرفك ،،
بلقاك ،،
شلتي من القمره نورها ،،
ومن نجيماتو وحضورها ،،
ومن بريق القبلي نوره ،،
ومن جمال الورد صوره ،،
وما أظن أوفيهو حقك ،،
إنتي يوسف في جمالو ،،
وإنتي حور العين كمالو ،،
وإنتي للقمـــــر إكتمالو ،،
وفيك جمال معدوم مثالو ،،
وكل زول يتمني ودك ،،
في العيون سبحان ربي ،،
والخديد أملس منــــــدي ،،
والصدير فاق التحــــــدي ،،
والشعر في الطول هندي ،،
وكل جميل بلقاهو عندك ،،
السمّار زادك وساما ،،
وفيك أجمل إبتساما ،،
برق السنون جاهر دواما ،،
ورمش العيون يغري السلاما ،،
قبل ما تغريه يدك ،،
أقسمت في حبك وفايا ،،
ونزرت للرحــــمن صوما ،،
يبقي إسمك في شفايا ،،
ذكري حلوة حقيقة لو ما ؟!؟ ،،
صديتي من قلبي وتركتي ،،
ذكري مُرة بين ضلـــــوعي ،،
هدّمتي أحـــلامي وبعدتي ،،
وبي إديك أطفيت شموعي ،،
في الغــــــرام أخلصت لما ،،
إتعجبوا العشاق في ريدي ،،
وكل زول عارفني همـــــــه ،،
لمـــن أعشق بفديهو ريدي ،،
في الغرام أنا زول مؤصّل ،،
وفتحت قلبي بكـــل قوّايا ،،
رسلت ليك مشاعري توصل ،،
وتعرفي إنك فــــــي الحنايا ،،
بين ضلوعى سكون حروفك ..
وصورة في جواي بتكبـّـر ..
والحنان الشايلــــو ليك ..
من زمان مكتوب مُسطـّر ..
بلقي فيك الراحة جنبك ..
وتبقي فيني حُب مُعطّـر ..
أصلو في يوم ما بسيبك ..
حتي لو كان بُعدك مُقدّر ..
القلب شايل هــــواك ..
والفكر في هواك مسيّر ..
إنتى وهّج الكون دا كله ..
إنتي البدر من سناك نوّر ..
إنتي أول ريد بعيشــوا ..
وريدك إنتي فيني غيّــر ..
إنتي درّه وما في زيــّك ..
وهبتي لي قلبي المُحيــّر ..
كل حنانك وكل مشاعرك ..
وريدة جواي يومي تكبّر ..
والحنان العيشتـــو قبلك ..
ما أظن في مشاعري غيّر ..
ريدي ليك شايل سحـابه ..
وحالفا في دنياك تمطّـر ..
ينهمر ينبوع حنانــــي ..
وفي هواك مراكبي تبّحر ..
كيف إليك أنظر ،،
أنتي الوفاء بعينه ،،
في وجهك البراءة تظهر ،،
أنتي رمزا ً للأصالة ،،
في ذكراك ديمه أسهر ،،
جمالك ينبوعٌ عزب ،،
في أعماقي تفجّر ،،
عيونك آية في عزّ الليل ..
نورها يشّع ..
رموشها بتحمل أحلي كلام ..
عيونك لوحة دافنشي ..
وحلم يراود بيكاسو دوام ..
معالم آسيا في عينيك ..
خليط ممزوج يروق إلهام ..
وروعة طرفك المكحول ..
سواده يزيل أسي وألام ..
ومن عينيك وحياتك ..
نشيل لعيونا راحة أعوام ..
و في عينيك آمالنا ..
تهدي عيونا حب وغرام ..
بشوف في عينك ،،
نقاوة النيل ،،
وطعم النيل ،،
ولــون النيل ،،
تلال التاكا في صــــدرك ،،
ونخيل الباوقة فـي قامتك ،،
قوام موزون نحيل خصرك ،،
خـــدود مزدانه بي شامتك ،،
شفائف فائحة بي عطــرك ،،
معالم باينة في صـــــورتك ،،
حواجبك نون طويل شعرك ،،
ونسمع نغمه مــــن صوتك ،،
أيادي حرير عفيف شخصك ،،
ونطمع فــــــــــي ملاقاتك ،،
جمــــال فتّان رقيق حسّك ،،
مكملة إنتي فـــــــــي ذاتك ،،
فكي – ( أبوظبي ،،،، 15– يوليو - 2008 م )
عشقتك ،،،
يا قمر السماء الضوّاي ،،
يا ضل الضحا الرامـــي ،،
أدوبي عليهو أحلي غناي ،،
عشقتك ،،،
يا نسمة ريـــــد فرايحية ،،
تسعد فيها أيامــــــــــي ،،
وأضمها لي بحنيــــــــــه ،،
عشقتك ،،،
يا سحــّــــاب برّاقو شال ،،
يحقق كل أحلامـــــــــي ،،
ويدي عيوني بشارة فـال ،،
عشقتك ،،،
ومن هواي خائف عليكي ،،
تشيلي هيامك من هيامــي ،،
وتمـــلأ الدمعـــات عينيكي ،،
عشقتك ،،،
بكل معـــــني العشق ذاتو ،،
بي حـــــواسي وبي كلامي ،،
وبكل مـــن ذاتي وصفاتو ،،
،،،،، ،،،،، ،،،،،
الفكي ،،، ( أبوظبي ،،،، 17 / يوليو / 2008 م )
أنا بين إيديك بعــــــــاني ،،
كل لحظة معاك بعـــــاني ،،
بعاني أحــــــزاني العميقة ،،
وانتي عارفـــــــه بالحقيقة ،،
إنـــــي إنسان زي مافـــي ،،
بكل كلمــــات المعانــــــي ،،
بعاني في حبك جراحـــــي ،،
وأساهر الليل وحدي صاحي ،،
لو تعـــــــــــــودي للمرافي ،،
ما انتي أول حب وتانـــــــي ،،
بعــــــــــاني من حُبّك إلي ّ ،،
وكيف زهــــــــور الحب نديا ،،
والشعر جافا القـــــــــوافي ،،
لمّا حبك فات ســـــــــــلاني ،،
بعاني بصمت الحــــــــروف ،،
والأمل جــــــــــــواي خوف ،،
أبقي في حُبّك مجـــــــــافي ،،
وانتي لي روحـــــــــي وكياني ،،
فكي – ( أبوظبي ،،،، 15 – يوليو / 2008 م )
من زمـــــن حبيت عنادك ،،
كلما فــــــي حبـــي بتعاند ،،
وأفضل أحاور مــره حبك ،،
لو مره لي حبـــــك يساند ،،
إلا حبك قاسي طبعـــــــوا ،،
وبرضوا بي إصرار يعاند ،،
المحبـــــــــة الكنا فيهـــا ،،
عشنا أدوارها بقســـــاوة ،،
مرة مرة نضوق حلـــوها ،،
وألف مرة نضوق شقاوة ،،
وانت برضك عندي غالي ،،
وكل يوم بتزيد غـــــلاوة ،،
كلما أحلف أفــــــــــوتك ،،
بلقي قلبي ليك راجـــــع ،،
شايل الأفراح في دمــه ،،
وانت فيهو تزيد مواجــع ،،
أصلـــوا ريدك فيني شب ّ ،،
وجمـــــر حبـــك فيّ والع ،،
لو هنـــــــاي أنا بين إيدك ،،
ما بدور لقلبي راحــــــــــة ،،
سيبوا خليهو فــــي عذابو ،،
وأوعي تفرد ليهو مساحة ،،
العزاب بـــــــي يـــدك انت ،،
والسبل عندك مباحــــــــة ،،
تاني ما تقول لــــي بحبك ،،
برضي إنسان ولي كرامة ،،
وأنسي إنو في يوم عرفتك ،،
وأصلي ما بوصل ملامـــة ،،
في الطــــريق الشقا دربك ،،
أمشــي تبراك السلامـــــة ،،
الدرديري – الفكي
أبوظبي في 15 / 07 / 2008 م
إتلاقينا بـدون ميعاد ،،
والصدفة أدتني أحلي هدية ،،
العسل للعيون ألوان ،،
والبياض في البشرة أزليه ،،
الشعر حرير والدهب لونو ،،
والخصل في الجبين شمسيه ،،
الصـدير للأفق شّابي ،،
والشفاه بالحمرة مـرويه ،،
وسألت عليك بي لهفـة ،،
وقالـــــــوا إنك قبطيـة ،،
بتحكـــي عنك الأيام ،،
وتعـــــــزف ألحان ورديه ،،
ونشيلك صـــورة في عيونا ،،
وتبقي الصــــورة أبدية ،،
وتغازل صورتك الأشــواق ،،
وتحضنك رمــــوش عينية ،،
والقاك فــي ليلي البهيم ،،
قمـــــــر يشع بحنية ،،
وأجاهر ليك بحـــب فياض ،،
وحبك فـي شريعتي منهية ،،
وأقول للناس وكل الناس ،،
قلبي عاشـــــــق مسيحيــــة ،،
،،،، ،،،، ،،،،
الديرديري- أبوظبي ،،، 08/ 08 / 2008 م ،،،
يا نيلنا يا نيل الفــــرح ،،
هام القليب فيك إنشرح ،،
لــــــون الخضّار جنبك رقد ،،
أصوات طيور كم زغزغت ،،
مرّت رياح شالت غيــــــوم ،،
لمّع البــــــــــرق قبل الرعد ،،
موجك عِلا ولي سماك عَلا ،،
وهبّت رياحـــــــو وأنعشت ،،
منظر بديع نَفَس الجمــــال ،،
بنحسّــــــوا فينا دوام رغد ،،
صوت السواقي هناك تدور ،،
تروي الخضــــار مهما بعِد ،،
تنبت زهور مــــن كل لون ،،
وزهـــور هناك ما ليها حد ،،
ولمّا النسّيم يعشق غصون ،،
ترقص تميل فــي كل وقت ،،
تديهو شبّال الفــّـــــــــــرح ،،
وزغرودة مــن ورقا ً نبّت ،،
يا نيلنا يا رمز الشُّمـــــوخ ،،
في أمدر هناك وسط البلد ،،
الطابية واقفه تشابي ليك ،،
عاشت عصور منذ الأمد ،،
تاريخ جميل وأكبر دليل ،،
حمت البلد مــــن كل يد ،،
يا نيلنا في وطن الربوع ،،
قامولك هناك في مروي سد ،،
خيرك كتيـــر لو قلنا خير ،،
نلقاك عديل ثروة وسعد ،،
أبوظبي،،
كاسر الأمواج علي ضفاف الخليج ،،
الساعة 11 مساء السبت 07 / 02 / 2009 م
إشتقت كتير لأهلي الحنــان ..
إشتقت للحب للدفئ والحنان ..
إشتقت لأمدر العريقـة ..
لي معالمها الجميلـة ..
ولي عيون الطابية السارحة ..
في النيـــــــل ..
إشتقت لي بلـدي ..
بلدي السمـح ناسا ..
بلدي الكـرم ساسا ..
إشتقت لنيل بلـدي ..
وخضار بلـدي ..
وجو بلدي النسيمـو ..
عليـــــل ..
إشتقت لبت بلـدي ..
بت بلدي الطباعها رزيـن ..
والتوب يزيدها عفة وجمال ..
إشتقت لتراب بلـدي ..
وربـــوع بلدي ..
وقيم بلــدي ..
ورطب بلدي البيشيلـوا ..
نخيـــــل ..
إشتقت لشمس بلـدي ..
وقمــر بلدي ..
ونجــوم بلدي ..
وشــروق بلدي ..
وغـــروب بلدي ..
وساعة الجلسة عصــرية ..
وحكاوي جميلة في موال ..
تبقّي همومنا منسيــــــة ..
وروعـة رؤية الحبان ..
ليها حـلاوة وطعم ..
جميـــــــل ..
ملامحك ما غريبة علي ،،
ضفائر نازلة علي الكتفين ،،
ولهجّة جميلة ليها رنين ،،
أساور فضّة علي الإيدين ،،
إبتسامة بتروي حُب وحنين ،،
وكل الشايفوا في العينين ،،
يأكّـد إنّـك نيلية ،،،
من نخيل أرض الشمال ،،
فيك سحر عروس الرمال ،،
غصن باباي في شجيرتو مال ،،
من تاجوج وارثة الجمال ،،
سمرة بشرة ليها خصال ،،
نردد في غناك موال ،،
ونسّهر حتي الفجّرية ،،،
لو شفنا وجيهـك ،،
نطرأ القمر ،،
سواد عينيك ينبوع سحر ،،
نفسك مسك فاح وإنتشر ،،
فيك الجمال أبدع صُوّر ،،
فيك البريق لألأ ظهر ،،
نمدح خصال نوصف بشر ،،
ونبقي في ريديك صُوفية ،،،
روحي معاك ،،
وقلبي معاك ،،
مشاعر خالــده تترجاك ،،
حُبّي رزين ،،
وطبعي رزين ،،
قليب بي شوقو بستناك ،،
حروف بتقولها أحلي عيون ،،
شتلت زهور ،،
قلعت زهور ،،
بذرت معاك حُبّي بذور ،،
بشوق إنسان ،،
ونبض إنسان ،،
نثرتي في قلبي أحلي شعور ،،
وهمسّك لي بزيدني شجون ،،
طريق حُبّك مشيتو خلاص ،،
ومهما يكون بدورو خلاص ،،
و يمسح عني دمـع العين ،،
لقيتو هواي فوق لي سماك ،،
لقيتك نجمة ضاوية سماك ،،
وتسكن روحنا في قلبين ،،
ولي لقياك صابر ممكون ،،
ديدي – أبوظبي ،،
07 / 04 / 2009 م
في عيونك نظرة ساحــــرة ..
وبالجمال نوصف عيونــــــك ..
والدلال إحتل فقـــــــــــره ..
وبالسواد كحّـــــــل جفونك ..
والرمـــــــــوش بالحب تدلت..
وعانقت بالود جبينــــــــــك ..
* * * *
في حدقات عيونك عنوانــي ..
كلما خطاي تتوه ترحــــــــل ..
وأسافر في بحور أشــــواق ..
وبلهفة حنين أوصــــــــــــل ..
والاقي الفرحة في دربــــك ..
وعود وعهود و أمنيات أجمل ..
* * * *
في عينيك أحلي كـــــــلام ..
حروفها بتعزف الحــــــــــانا ..
تردد في غناوي الريـــــــــد ..
عينيك بسّامة نعســـــــــانا ..
وكل الشاف جمال عينيــــك ..
يدوب في جمالهم ولهــــــانا ..
* * * *
عينيك الروعة بي ذاتهــــــــا ..
نورها بيبهر كـــــــــــل الناس ..
عينيك معاني في ذاتهـــــــــا ..
دّر ياقوت جوهر ومـــــــــــاس ..
وتبقي عينيك شمس الكــــون ..
ومحال الشمس بعينيك تنقاس ..
الزمان فــــرّاق ..
والشوق حرّاق ..
والهوي دفــّــاق ..
والقليب مشّتاق ..
لي لقاك يا ( ريم ) ..
* * * *
العمر أفـــــــراح ..
في لقاك يكـــون ..
بدر نـــــــوره لاح ..
بيه القليب مفتون ..
داوي كل جــــراح ..
وفارق دربي ألم..
* * * *
مـــــرت ايـــــــام ..
في بحــــور الريد ..
حبي ليـــك دوام ..
كل لحظة يزيــــد ..
في وداد وغــرام ..
عشت يا ما وكـم ..
* * * *
العيون ضاحــكة ..
والثغر بسّــــــام ..
والخدود لوحــــة ..
رسمتها الاقــلام ..
والشــــفاه وردة ..
لون وعطر وطعم ..
الفرحــــة البانت في خدودك ..
كشفت أسرارا وجنـــــــــاتك ..
والثغر تبسّم في روعــــــــة ..
شفتيك تترجم نبـــــــــــراتك ..
بالحب غمرتي دنيتنــــا ..
وبقينا بنحلــــف بحياتك ..
العمر سعادة في قربك ..
لو نقدر ونبلـــــغ غاياتك ..
لو تقبلي وتبقي في حياتي ..
مشوار تمشيهو خطــــواتك ..
والقاك حقيقة في ذاتـــــي ..
لا خيال لا طيف من ذاتــــك ..
وفي الحب تتوحد أعماقنا ..
ويلبي قلبــــــــي رغباتك ..
وأشيلك صورة في عيوني ..
وأعشق من ثغرك كلماتك ..
ونتلاقي في عشـــــــــة ريدتنا ..
نغماتي تعانق نغماتــــــــــــــك ..
و الفرحــــة بتظهر في خـدودك ..
و تكشف عن سرّها وجنـــــــــاتك ..
قد تكوني ،،
قلبي و عمري ،،
شمسي وقمري ،،
أنسي وسمري ،،
وقد لا أكون ،،
قد تكوني ،،
معنا ً لذاتي ،،
لُبّ أمنياتي ،،
راحة حياتي ،،
رغم الظنـون ،،
قد تكوني ،،
سنتي وفرضي ،،
سمائي وأرضي ،،
طولي وعرضي ،،
وكل ما يكون ،،
قد تكوني ،،
تاجا ً لرأسي ،،
رونق حواسي ،،
بحري ومراسي ،،
وعشمي البكون ،،
قد تكوني ،،
حلمي وحقيقتو ،،
أملي البنيتو ،،
حبي اللي عشتو ،،
مهما يكون ،،
قد تكوني ،،
إنتي البــداية ،،
وإنتي النهاية ،،
وإنتي الروايه ،،
بكل لون ،،
قد تكوني ،،
أبيات لشاعر ،،
يرويك مشاعر ،،
مكمون وصابر ،،
باكي العيـون ،،
قد تكوني ،،
و مهما تكوني ،،
نبضي وعيوني ،،
فرحي وسكوني ،،
بهديك كون ،،
قد تكوني ،،
حبي الحقيقي ،،
قنديل بريقي ،،
زادي في طريقي ،،
يمحا الشجـون ،،
يا رب تصونها ،،
وتستر شؤونا ،،
وتحفظ عيـونا ،،
بي قاف ونـون ،،
تسلم إنت يا حبيب ،،
ويسلم قلبك الطيب ،،
عيونا وسادة لعيــونك ،،
عبير أنفاسنا في جيدك ،،
نغيم من فاهنا ترديدك ،،
ونغالب فيك أجــاوديك ،،
وتبقي معانا ما مغيب ،،
تسلم إنت يا حبيب ،،
ويسلم قلبك الطيب ،،
نسالم طــرفك النعسان ،،
بلهفة ريــــــد ملانا حنان ،،
نشيلك جوّه في الوجدان ،،
صــورة جميلة لي إنسان ،،
آمالنا فيهـــــــو ما تخيب ،،
تسلم إنت يا حبيب ،،
ويسلم قلبك الطيب ،،
برسل ليك فـــي غيابك ،،
رسالة حروفها أشواقك ،،
يجيبها حمام علي بابك ،،
ونحــــلف فيها بشبابك ،،
تكون من هوانا قريب ،،
تسلم إنت يا حبيب ،،
ويسلم قلبك الطيب ،،
الفكي- أبوظبي ،،، 11 / 08 / 2008 ،،،
الورود غيــــــرانه منك ،،
في الجمال القالوا عنك ،،
وقالو إنك ،،،،
شلّت من الفل عبيرو ،،
بعبق معــدوم نظيروا ،،
والبنفسج لونــو منك ،،،
الورود عــرفت مقاما ،،
وكل وردة يزيد هياما ،،
ولفلفت أوراقهــا فنك ،،،
كل وردة بتشتهيكـــي ،،
عامره بالسحر العليكي ،،
وتعزف الأنغام بلحنك ،،،
إنتي عطر الـــــورد كلو ،،
إنتي ريحانو وفلــّــــــــو ،،
وللحسان يمكـن وأظنك ،،،
تبقي ليهم في الليالي ،،
نور بيضوي في الأعالي ،،
وتنور الطـــرقات بسنك ،،،
ونحن بي ريـــــدك بقينا ،،
قصة حـــــــلوة بتحتوينا ،،
كل فصولها بتحكي عنك ،،،
ديدي – 15 / 7 / 2008 م ( أبوظبي – البطين ) ،،،،
لمّا الكلام يرجع يجيك وتلقي المعاني إتبدلّت ،،
أصلو الكلام الكان قبيل فيهو المعاني إتجملّت ،،
حاسب كتير تجرح أمير إيدهو فيك ما قصّرت ،،
*********************
لو كان كلام وعتاب غرام جابوه ليك ما تصدقّـّو ،،
شافو القلوب ضاميها ريد جابوا الكلام شان يفرقـّو ،،
لكن محال يبقي الكلام سبب الفراق مهما بقـّو ،،
*********************
حاول تعيد كل الكلام لو مره واحدة في دنيتك ،،
وأسال كمان قلب الحبيب تلقاهو لسّه بيعشقك ،،
أنسي الكلام و كل الكلام وخلينا نعبر سكّـتــك ،،
*********************
بعد الحصل خليك معاي أصلو الحصل كان بس وشي ،،
لا قلت فيك كلام عتاب لا كلمة جارحة ولا أي شئ ،،
راجيك تعال شايل السماح وأسعد قليب بيك منتشي ،،
لما جات الريدة جاية ،،
كنتي أول ريدة عشتها ،،
كنت قايل نفسي وحدي ،،
إنتى أول زول عشقتها ،،
وكنت قايل إنو قلبك ،،
خاتي لي جوّاهو حتّا ،،
والحقيقة المُرّه ذاتها ،،
إنو قلبك زي سحابا ،،
تسعد الناس بي غيوما ،،
وتجافي قلبا ً بي غيابا ،،
كم قلوب شايلاها قلبك ؟؟ ،،
وفي هواك لاقت عذابا ،،
خلي بالك من قليبك ،،
أوعي يوم تلقاهو ندامه ،،
حددي القلب البريدك ،،
وأدي حبك ليهو دواما ،،
القلب ظنيتـو واحد ،،
وما بسع تمليهـو ياما ،،
في مرّه جيت سايق خطّاي ،،
حالف يمين أهديك ريد ،،
لا شفتّي زيّو في دنيتك ،،
لا جاك زائر من بعيد ،،
أصلوا الغرام الشّايلو ليك ،،
يادوب بيرضع في الوريد ،،
وباكر بيكون شايفاو عيون ،،
والدنيا تصبح لينا عيد ،،
وتشوفي زول خاتّيك وين ،،
في قليبو جوّه عُمر مديد ،،
راجي القمر ينزل يقول ،،
هجّر المدار لي زول جديد ،،
والحب وصال يجمع قلوب ،،
يحكّي الجمال كلّو ويعيد ،،
ويبقي المُحّال سهل المنال ،،
جمًع قلوب وفي الريد بزيد ،،
أحلف وأقول ياكي العزول ،،
ويبقي القليب في هواك شهيد ،،
رغم الظروف أنظم حروف ،،
وأنضُم درر لأحلي جِيد ،،
أبوظبي - 07 / 02 /2009م
لو بتعرف يا حبيبي ،،
إنو حبك فيني باقي ،،
ولسّه ريدك بين ضلوعي ،،
ذكري حلوة في التلاقي ،،
*****************
ما نسيت في يوم هويتك ،،
وما نسيت إخلاصي ليكا ،،
و كل لحظة بيعشوا حبك ،،
في كل نظرة من عينيكا ،،
*****************
ريدنا قصة سطورها تحكي ،،
عن مشاعرعشنا فيها ،،
في كل صفحة نحتنا ذكري ،،
والحنان عاودني ليها ،،
*****************
كلمة واحدة رجيتها منك ،،
وكلمة تانية تكون حقيقة ،،
ترجع أيامنا الخوالد ،،
أصلـّي دايرك لي عشيقة ،،
أنا حُبي ليك ،،
أنا يا هَناي ،،
بزداد معاي ،،
أنا في جوّاي ،،
أنا حُبي ليك ،،
قدر النجوم ،،
عدد البشر ،،
عدد النبات ،،
عدد الجماد ،،
عدد اللي فات ،،
عدد اللي جاي ،،
أنا يا هَناي ،،
أنا حُبي ليك ،،
ما بتوصف ،،
أنا حُبي ليك ،،
جوّه القليب لو بتعرف ،،
أنا حبي ليك ،،
من الألف ،،
لآخر حرف ،،
أنا حُبي ليك ،،
زي اللي كان ،،
عارف زمان ،،
إنتي الجِنان ،،
والحور هناك ،،
جالسين حداك ،،
طالبين رضاك ،،
في كل شئ ،،
أنا حُبي ليك ،،
حيعيش أكيد ،،
فوق المُحال ،،
أعلي الظلال ،،
تاريخ مجيد ،،
ما بتنسي ،،
أنا حُبي ليك ،،
أنا يا هَناي ،،
صادق كتير ،،
عبر الأسير ،،
بلقاكِ غير ،،
كل المعاي ،،
أنا حُبي ليك ،،
فائض غرام ،،
زايد دوام ،،
في كل عام ،،
راجيو يجيك ،،
أنا حُبي ليك ،،
حلمي الأخير ،،
أملي الوحيد ،،
عمري الجديد ،،
فرحي اللي جاي ،،
لو قلتي خير ،،
أبوظبي جداف البطين ،،
الأربعاء 04 / مارس / 2009 م
نغيم فاهِك ،،
بدوبني ،،
وبعذبني ،،
وبتسري النشوة في قلبي ،،
وأقول أتحاشي كلماتك ،،
وما بقدر ،،
ترن أجراسا همساتك ،،
أرد بلهفة أشواقي ،،
عشان أسمع نغيماتك ،،
ويدوب في حروفها إحساسي ،،
وأشيل من عطــرك أنفاسي ،،
بدون أشعر ،،
نغيماتك بتأسرني ،،
رنين صوتك بيسعدني ،،
حروفك ليك توديني ،،
بسيماتك ،،
صرير نَفَسِك بحِسّو براي ،،
بحس بي حرارتو في خدّي ،،
وبتشهّد ،،
وما بفتر ،،
وتهربي مني لذاتك ،،
عشان عارفها لذاتك ،،
بتسعدني ،،
وتخليني ،،
أشيل بصعوبة أنفاسي ،،
وأضاري النشوة في ذاتي ،،
وبتفضح قلبي خفقاتو ،،
وبتبعثر ،،
في لحظة سعيدة بلقاكي ،،
وكم بتمني اللحظة تطول ،،
وأخاف أغرق في بحر هيام ،،
وأنا اليادوب بعرف العوم ،،
أقول أهرب عشان ألقاك ،،
وتبقي طوقي من الموج ،،
أمد الإيد وتمشي بعيد ،،
أناديك ،،
وأقول ليك ،،
عليك الريده ترجعي لي ،،
قبل ما الموج يودرني ،،
وأدوب في مويتو زي ،،
سكّر ،،
مَخّيره إنتي في ريدك ،،
ومَسّير قلبي في ريدك ،،
وبتمناك ،،
تكون النشوة ليك براك ،،
وتحسي اللهفة في جواك ،،
وما تخافي ،،
تغمضي بس عويناتك ،،
بتسري النشوة في ذاتك ،،
ومن ذاتك ،،
بعيش أفراح ،،
وهم بنزاح ،،
ويعدي صيامي ،،
وبتسّحر ،،
دراديرو ،،
أبوظبي - شاطئ الراحة ،،
في أمسية الثلاثاء 07 / 04 / 2009 م
كُلْ الحُـروف إتحيّرت وإحتارت معاي من ريدي ،،
ليك
حرف الألف وقف إنتباه وشّاف الجمــال ،،
المُحتويك
حرف الباء عجبو المقام حالف يمين ما يسيب ،،
عينيك
حرف التاء تأتأ كتير غلبو الكلام الحا يقولـــو ،،
ليك
حرف الثاء ثائر معاي قرر يكــــون غيران ،،
عليك
والجيم جَلَبْ كل الظروف لو مــرّه بس يقدر ،،
يجيك
والحاء حِلْم في ليل سعيد شّاف الجمال في نور ،،
وشّيك
والخاء خِّجل من العيون الشّايله لــون نور ،،
وجنتيك
والدال دوام يسّعد معاي من دون حــرج قبّل ،،
يديك
والذال نزر لو ذاق رحيق أجمل عِطّــر خالقينو ،،
فيك
والراء رحـل شال العَتاد صنقر هناك في ضُل ،،
عينيك
والزاي بِعِيّد زمني المعــاك لمّا القليب مجبور ،،
بجيك
والسين سِحر نور العيون وسَحرت عيون ولهانه ،،
بيك
والشين شعــور بكبر معاي في كل يوم بهديهو ،،
ليك
والصاد صفاء قلب الحبيب الماشي في خطوات ،،
مشيك
والضاد حجب ضئ القمـــر لمّا القمر قال ،،
بصطفيك
والطاء طريق مكتوب علي وحالف يمين يوصلني ،،
ليك
والظاء ظهــر نورك معاي لو مرّه بس ألقاك ،،
شريك
والعين عبير فاح في القلوب عطّر عِشق جايّو ،،
وشيك
والغين غمر بالحُبّ فؤاد أسر الحواس في الليلة ،،
ديك
والفاء فَــرَح أسعد قليب وآسر عيون مُشتاقة ،،
ليك
والقاف وهب قلبي العزول أجمـل عشق كان ،،
مُرتجيك
والكاف كلام شايلاو عيـون وكل العيون مشغوفة ،،
بيك
واللام لهيب شــوق العيون لما العيون تشّتاق ،،
عينيك
والميم مُحال أنساك ولو خَتـّـو الشمس ما بين ،،
يديك
والنون نداك يا سعدي بيو وقتين يحين ويسوقني ،،
ليك
والهاء هيام بلقاو أكيد في كل يــــوم بِحْتاج ،،
إليك
والواو ولع حاضن القليب ضامي الضلوع خائف ،،
عليك
والياء يمين أحفظ هواك في كل حين لوحــان ،،
مَجِيك
مــــ تحياتي أنا ــــع ،،
الإمارات – أبوظبي ،،
البطين – 03 / 04 / 2009 م ،،
الساعة الواحدة ظهرا ً ،،
شايف العيــــون مشتاقة ليك ،،
دايرات تشـوف نورك هناك ،،
وشايف القليب حزنان وحيد ،،
راجي الحنان طالب رضاك ،،
وشايف الأمل سايقنـــي ليك ،،
فارد جنــــــاح قاصد هواك ،،
وشايف بــراي شوقي الكتير،،
شقّ الزمـــــــن جايك براك ،،
وشايف السراب حضن الأمل ،،
لمن أقـــــــول بوصل سماك ،،
وأمسك نجــــــوم كم تزدهر ،،
وأعشق رحيق شايلاو شفاك ،،
وألقي النجوم نورن سطــــع ،،
جهر العيــــون ضوّن عُلاك ،،
ويبقي الحلــــــــم فارق منام ،،
لو كان مناي صـــادف مناك ،،
وأهديك جمـــال من كل لون ،،
وأحصد حصاد راجيو معاك ،،
في الوقت داك يا سعدي بيك ،،
وكتين نداي شـــال من نداك ،،
أبوظبي - 30 مايو - 2009 م
عشان ردتك
تقولــــي علي ّ ما ردتك !؟
وكيف الريده في عيونك
تكون ميزان
برجّح بكــــــــــلام إنقال
بدون ميعاد
تجيك حروفو في مرسال
بخلــّي الزول
يدور بي عقلو ألف سؤال
عشان ردتك
بتكتبي مــــره يا حلوة
حروف معسولة بيدك
بشوفها براي
وبسرح فيها ليلي الجاي
وبحلف فيها بي ريدك
محال أقسي وأخون عهدك
ومــرات ترجعي تكتبي لي
حـــــروف نيرانها مشتعلة
وأسامحــك بقليب ولهـــان
أقــــــــول أسبابــها مفتعلة
وعشان ردتك
تخلـــــــــي بقلبي آه وأنين
وتكتبي لي نهايتنا
بدون تفكــــير بدون تحضير
بدون إنزار تجيبي قرار
وتبقي الريده متناسيه
عرفنا زمان في ماضينا
بقعدوا كبارنا جنب زولا ً
وكت الروح تبقي خلاص
عايزه تروح
ويصبـــــروا فيهـــو لحظاتو
وما ممكن يزيدوا عليهو آهاتو
وتفارقو الروح بدون يعرف
مصيرو يكــــون زي الفاتو
عشان ردتك
تخلــّـــــي قليبي زي قندول
يصارع في رياحــو براهو
يلم حباتـــــــــو نص الريح
وبترنح
تسوقو الريح شمال ويمين
وتلعب بي عواطفو كمان
وبتبدل فرح عمرو
وتسكن مطرحها الأحزان
عشان ردتك
تعجلــّي في حسابك لي
بدون إلهام
وكيف تتمني أبقي سعيد
وأنا الصابر علي الأيام
الأقي الوعد مكتوب لي
في أول يوم من التامن
أحدد لي شعوري طريق
إما يكـــــون طريق آمن
أو حيكون مصيري إعدام
عشان ردتك
بقول ليك
ولسه الريده في جــواي
وما بتمرق
إلا النفس عـــــــزيزة علي
وما ممكن تقلل عزتها الريده
كرامتي بصــــــونها بإيدي
عشان تفضل كبيـــرة علي
وأقول ليك
عشان ردتك
بسوق خطواتي من دربك
وأعيش بذكــــريات حبك
عشان ردتك
نحــــــاول ننسي ماضينا
ونفتش سكــــــــه تأوينا
بعد قولك
قطعتي وصال مناي لو دام
وضعتي سؤال حلال وحرام
طفيتي شموع قبل ما تذوب
جريتي دموع كتلتي قلوب
قلعتي شتول في أول عام
عشان ردتك
بقول ليك
في آخر القول بكون محتار
وبهديك
وداع زولا ً عرفتي براك
بشيل قلبو وبفـــوت دنياك
وتفضل سيرتو ليك تذكار
ولو درتي تعرفي كمان
مكانتك وين من الوجدان
مكانتك جــــــــوّه عيني ّ
فراقك بس وحاتك كان
طلب منك عيان وبيان
عشان ردتك
بقول ليك
أوامرك عندي حتميّه
ورغباتك
بتبقي علي ّ منهيّه
وبكل سرور وطيب خاطر
بفوت دربك
وتبقي الصفحــــــة مطويّه
عشان ردتك
يا ريت مناي لو كان يكون ،،
في يوم يكــون حِسّك رهيف ،،
ويسعَد مناي بين كاف ونـون ،،
وسط القمر بمسك نجوم ،،
وبين فاء وميم يحلو السكون ،،
لو كان منـاي صعب المنال ،،
وخاب الرجاء وخابت ظنون ،،
أحسن يكون ردك صريح ،،
من غير خجل جايباو عيون ،،
وأحسن كمان أعرف براي ،،
لو كان مناي جاب ليك شجون ،،
ولو كـان مناي سهل المنال ،،
راجي الأمل في صوت حنون ،،
يشرق صباح قبال يحين ،،
وتسطع نجوم فوقك تكون ،،
وتشيل سماك أجمل سحاب ،،
وتمطر مطر من كون لكون ،،
وتنبت ثمار تعكس خدار ،،
ويبقي العنب بان في الغصون ،،
ريدك حِيا وفيني إتولد من دون ميعاد جابو ،،
القدر
خائف أقــول ريدك مُحال أفقد هواي لزول ،،
ندر
وخائف كتير من ريدي ليك رغم المُحال ليك ،،
ينهمر
وخائف أكون إنسان صغير لو قلت ليك ريد ،،
وإندثر
وتبعد خُطاك عن ريدي ليك ويرجع جفاف ،،
ما منتظر
أنا أصلي زول جيتك براي طالب هواك دون ،،
البشـر
في يوم تلات والجو بديع كترت غيوم نازل ،،
مطــر
جاك الكــلام مليان غرام من قلبي ليك فاح ،،
وإنتشر
صــــوتك دليل نفس الغرام جواك لي كان ،،
مستتر
ومشيت معاك سكة غرام فيها العيـون عشقو ،،
السهـر
ريدك كبر جواي نما وجار للسما لكل زول بائن ،،
ظهر
وأحضن هواك بين الجفون وأسدل رموش ويعمى ،،
البصر
وأرجع وأقول زي ما بديت خائف هواي ليك ،،
يندثر
وخائف أقــول ريدك مُحال وأفقد هواي لزول ،،
ندر
عشانك ياما عبرت بحور ،،
طويت أحلام جفيتـو منام ،،
سكبت أشواق عليك بدور ،،
خِصالك باينة في عيوني ،،
خدود أسحّار ،،
ورود وأزهار ،،
وشيش دوّار ،،
عُيون سارحات ،،
رموش غارقات ،،
عقول تِحتّار ،،
تقول القمره بدر بدور ،،
قوّام فتّان ،،
نغيم رنان ،،
كلام معسول ،،
صدير رُمّان ،،
جمال ممزوج ،،
بروح إنسان ،،
يخلّي قليبنا فيو مأثور ،،
حواجب نون ،،
جبين ضوّاي ،،
عليها خِشيم ،،
بِدُوبِي غُناي ،،
خديد ريان ،،
نفِيّس ريحان ،،
يمسّخ لينا كل عطّور ،،
عشانك إنتي يا حلوة ،،
بجيك أميال ،،
وأشيل آمال ،،
وراحة بال ،،
بشارة فال ،،
حروف تتقال ،،
وفي عينيك ،،
بكون رحّال ،،
وأعيشك إنتي أحلي شعور ،،
بشوف في عينيك ،،
جمال الكون ،،
ونور الكون ،،
ولون الكون ،،
وطعم الكون ،،
وسِحر الكون ،،
وعِطّر الكون ،،
وكُل الكون فرح وسرور ،،
ويلمّع نجمّــك الضوّاي ،،
وكل الناس تشوفو معاي ،،
بُشارة خير ،،
ونور في عُلاي ،،
ينور لي ،،
زماني الجاي ،،
وأعيشك إنتي في جواي ،،
نغيمة ناي وصوت طنمبور ،،
عشان عينيك يا حلوة ،،
بفارق الهم ،،
ويِرُوح الغم ،،
والأقي معاك أفراحي ،،
بشوق تِنجم ،،
وتبقي الريدة جوايا ،،
مكانه القلب ،،
ومجري الدم ،،
وفيك الأقي جمال الحور ،،
ويسعد حُبّك أيّامي ،،
وأعيشها معاك أحلامي ،،
بشيش في بشيش ،،
ألاقي عينيك قِدّامي ،،
وسِحر الدنيا جوايا ،،
هداوة ريف ،،
ضجيج بندر ،،
رمال قيزانها تتبختر ،،
مطيره تردد أنغامي ،،
شموس وأقمار عليك تدور ،،
وأنا الراجيك حاضن الموج ،،
تمر أمواج ،،
تهيج أنهار ،،
وأسلّم نفسي للتيار ،،
تفوت الموجة بين يدي ،،
أقول أغرق ويا ستّار ،،
ويهدأ الموج ،،
وفيهو بحتّار ،،
وأتمسك بقشة ريد ،،
وتبقي القشة لي فنار ،،
وأبقي وحيد ،،
وأقرب مركب ،،
مني بعيد ،،
وتبقي الضلمة راجية النور ،،
وأرجع تاني للأول ،،
عشان ريدك بقول ليك ،،
عشانك ياما عبرت بحور ،،
طويت أحلام جفيتـو منام ،،
سكبت أشواق عليك بدور ،،
دّدّر ،،
أبوظبي – البطين ،،
06 / 04 / 2009 م
